Lille:alternataire, le site du CCL

L'Ascinsion (suite) : Inri l'cront tête monte au ciel

2023-02-02T12:14:57Z

Article paru dans Le Combat de Roubaix-Tourcoing 1re année, n° 15 (3 juin 1906).

Tous les abrutis ayant erchu les lettes d'invitation pour assister au départ d'Inri l'cront tête s'sont mis in route pou l'égliche du Mont-à-Leux, j'vas avec plaiji signaler aux lijeux du Combat, signaler inne paire de sociétés qui ont l'assisté au départ d'Inri pou l'Paradis.

L'départ, comme in sait, étot fixé à tros heures. À 2 heures 1/2 in vot arriver l'premi groupe, ch'est tous des garchons d'neuf ans, in avant, y a in p'tit garchon ; qui porte inne bannire avec s'l'inscription qu'tout l'monde lit avec tchuriosité :

Nous sommés de petits chrétiens

Victimes de la rue d'la Monnaie,

Par l'immonde Saint Flamidien,

Nous avons été contaminés.

Su i'bannire, y a aussi in grand portrait d'homme habihi inveuc inné jupe noire et y avot inne bavette blanque, in arôt vraimint dit in frère des Écoles catholiques.

L'deuzime groupé, ch'est l'groupe des mères chrétiennes du Brin-Pain condut par Monsi Fitaine, bin connu des Tourquégnons, y a même été jeué plusieurs piches de théate sur l'invitation des procureurs de Lille et d'Douai, pou li jeué ses piches, y ratira toudis des p'tits garchons avec li, les uns eh'étot pou figurer, les autres eh'étot pou dire qui avottent jeué des piches avec li dins des p'tits tcheux à l'brenne. S'groupe de mères chrétiennes a pris pou dompteur Monsu Fitaine pasque Vangrossbal II a fait condamner Inri l'cront tête.

Naturellemint, chaque groupe a sin drapeau ou bin s'bannire, su l'ceulle des mères chrétiennes, on lit cette devise :

Ch'est nous les mères chrétiennes

Du bon quarti du Brin-Pain.

ln a tchéusi poil dompteur' Monsi Fitaine

Qui f'ra d'nos p'tits garchons des p'tits saints.

Su l'bannire in veyot in prêtre exposé comme martyr et tout l'tour d'li des p'tits garchons t'nant in livre tout grand ouvert, d'où qu'in pouvot lire, des comptes-rindus des proches d'cour d'assises.

L'trosime groupe, ch'est tout chin qui a d'pu propre (pardon d'pus sale) ch'est l'groupe des djaunes, n'sont po à gramint cha s'comprint, personne n'est amateur de salir avec des individus pareils, personne n'est amateur de s'mette avec des traites. Tchanque l'groupe arrive tout près d'l'égliche tout l'monde s'ertire d'eus comme d'la peste, tell'mint y sont répugnants, y a l'cras Lingliche avec Mathou, Eugène dit Liette, Défailli de l'rue des coulons, Kinfleur de l'rue d'Moscou qui porte l'drapeau d'jaune, Dinds dit Witche qui tint l'life d'ù qui sont inscrits tous les lâchetés commises par eusses depu qui ont fondé c'joli groupe de traites, rin que d'les wetti in vot qu'ch'est des êtres capables de trahir leu pères et leu frères pour inne paire de louis d'or, comme tout l'monde est ortiré d'eusses, in vol l'groupe au mitan de l'rue, in dirot vraimint in troupeau d'sales pourcheux prêts à ête vindu à l'abattoir, in vot l'drapeau d'jaune qui flotte inveuc s'l'inscription.

Vil troupeau de traîtres

Par les ouvriers, repoussés avec dégoût

Qui faison le jeu de nos maîtres.

Du pied nous devons être repousses à l'égout.

Infin j'pinse bin qu'elle assez comme
cha, y n'd'avo bin acore d'autes à signaler mais y n'd'ara plein l'journal, y et tros
heures tout l'mondo attind l'départ, tout d'in cop in vo apparaître l'virge (pardon
Marie Madeleine) tout lmnonde claque des mains, tchan que l'silence est rétabli
elle prononce ces paroles :

Mes chers apôtres.

En ce jour mémorable

Moi, et mon fils Inri

À tous les gens honorables

Nous avons lancé notre dernier cri

Aussitôt par tout le monde

Notre appel fut entendu

Depuis les traîtres —castes immonde

Jusqu'aux idiots confondu

Dans quelques heures avec Saint-Pierre

Inri sera assi au paradis

Heureux d'avoir subi le calvaire.

Et capter la confiance des abrutis

Après son départ « la gloire » .

Nous la chanterons dans nos taudis

Ce sera pour nous une gloire ,

D'avoir assister au départ d'Inri.

Après avoir li eu s'récit elle dit à les abrutis d'sabachis pour adorer l'Saint-Esprit qui va monter au ciel, tout d'suite les abrutis abaçh'te leu tête, Marie Madeleine sartourne sur Inri et elle dit y sont tertous abachi, laiche aller tin coulon Inri et t'heur invo, enn'paire de minutes après les imbéciles y élévent-le le tète et Mari'Madeleine dit in montrant l'coulon « y est la va qui s'in va, ché l'saint-esprit ».

Aussitôt tout l'monde queminche a é crii « vive Inri ! vive vive l'saint-esprit ! » pindant c'temps-là Marie-Madeleine s'in va'trouver Inri in dijan : tout d'même les gins y sont rud'mint bête d'croire que te sait eu d'transformer in coulon, et dire qui a acore des gins qui croitent à tous ces imbécilités, ché pou cha qh'les prêtres y ont raijon d'dire tant qu'les gins y s'ront abrutis par la religion in vivra heureux.

L'Petit Batisse.

L'Ascinsion : Hinri l'cront tête monte au ciel

par l'petit Baptiste (Jean-Baptiste Knockaert) — 2023-02-02T08:24:23Z

Article paru dans Le Combat de Roubaix-Tourcoing 1re année, n° 14 (27 mai 1906).

Tous les lijeux du Combat y sont acore à l'mémoire qu'Hinri [1] l'cront tête y est mort eu l'13 du mo d'Avril passé. Ch'est-à-dire eul'venterdi saint à tros heures de l'après-l'dîner après avoir été condamné par Vangrosbal II l'dompteur du brin-pain, a ette cloé sur inn' cro, mais c'gayard d'Hinri y a ressuscité inne paire d'jours après s'mort, et y a été s'muchi à l'majon de s'maitresse, Marie-Madeleine pou li d'hérir les cos qui avot erchu.

Infin, le v'la d'jéri, mais toudis rester din l'majon de s'maitresse ch'étot malheureux pour li, car y avot toudis peur de sortir, peur d'ête vu par Vangross'bal II crainte que s'capenoul l'arot acore fait condamné.

L'semaone passée, y l'y vin inne idée, y dit comme cha à s'maitresse Marie-Madeleine vu que j'sus d'jéri d'mes blessures, j'm'in va tirer in beau plan, vu que j'su l'garchon du bon Di, j'm'in va invoi des lettes pa tous les facteurs à l'majon des abrutis pou leu donner rendez-vous in leu dijeant que j'va monté au ciel sans etchelle.

Marie-Madeleine. — Quo qu'te pinse de faire Inri !
Inri. — Ch'est bin simple, te sais bin qu'les abrutis y croitent que j'sais m'transformer qu'mint que j'veux, d'abord pindant les trinte tros ans qu'f'ai fait de l'propagande, j'leur ai toudis dit qu'étot l'garchon du bon Di et que j'savos m'tchangi in tros personnes.
Marie-Madeleine. — Tcheu pillule, ma mère !
Inri. — Ouais, ch'est inne bonne pillule, après cheulle là in peur tirer l'etchelle.
Marie-Madeleine. — J'te cro Hinri.
Inri. — J'ai dis que j'savo m'tchangi in tros personnes, din ses tros, y a l'Saint-Esprit qu'j'ai toudis erprésinté sous l'forme d'in coulon et bin, t'iras aquaté in coulon, et l'jour venu, tchan qu'tous les abrutis y s'ront au rendez-vous, te t'f'ra passer pour l'femme du carpinti, Joseph, c'est-à-dire l'Sainte-Vierge. À in momint donné, tchan que j'te f'rai in clin d'œil, t'leu dira d'abachi leu tête pindant inne paire de minutes pou mi avoir l'temps d'aller m'muchi tchan que j'arai lachi l'coulon.
Marie-Madeleine. — T'a raijon, Inri, ch'est l'pus beau plan qu'te peux faire mais pou sortir d'ichi te vas ête erconnu inveux t'barpe.
Inri. — J'va l'rasé mi-même.
Marie-Madeleine. — Ouais, mais si te t'présinte sans barpe à tes apôtres, y n'vont po t'erconnoitte ?
Inri. — So trintchille, Marie, min plan y est tiré, t'ira aquaté inne fausse barpe et tchan qu'arrivrai au rendez-vous, je l'mettrai.
Marie-Madeleine. — Tchan qu'te conte faire tin rendez-vous pour attraper les idiots.
Inri. — L'jeudi 24 mai à tros heures de l'après-diner.
Marie-Madeleine. — D'ù qu'te pinse machi tin coulon !
Inri. — Je n'sais po, j'fro bin rendez-vous au mont d'Halluin ou bin à l'égliche du Mont-à-Leux [à Mouscron ?].
Marie-Madeleine. — Fait l'rassemblement au Mont-à-Leux,ché là, l'mi d'tout, aussitôt qu't'aras lachi tin coulon, te pourra aller t'muchi din l'petites ruelles.
Inri. — T'as raijon, ma chère, tin v'la copie des lettes que le portera à la poste pour attraper les imbéciles.

(À suivre)

L'petit Baptiste.

[1] Hinri, surnom anti-clérical de Jésus sur sa croix d'après le sigle INRI.

Pélerinache des d'jaunes (sute)

par Jacques Rouge (Jean-Baptiste Knockaert) — 2023-02-01T17:08:54Z

Article paru dans Le Combat de Roubaix-Tourcoing 1re année, n° 13 (20 mai 1906).

Dinds dit Wilche. — Vu que j'sus secrétaire ; j'm'in va vous lire l'compte-rendu d'la réunion qu'in a décidé d'venir in pélerinache et vous explit'chi pouquo qu'in est v'nu trouver l'virge de Marlire.
Plusieurs voix. — Silence, silence !
L'ingliche. — Silence, tas dé mouchards.
Dinds dit Wilche. — Depus qu'in a trahis les ouvris, y arra au mos d'avril tros ans, in est toudis attatchi pa les honnêtes gins in n'peut pu sortir de s'majon sans vir sot l'in, sot Faute qui nous dit : T'es là, hé vorin t'es contint d'avoir trahi les copingnons, t'as du bon ouvrache à tin patron, infin, ch'est à désespérer.
Eugène dit Liette. — Pourvu qu'in est v'nu servir, i'voros bin que l'secrétaire nomm'ro tous les fabriques que l'd'jaunisse s'a d'jà fait sintir, pour que l'virge sache à t'chi qu'al a affaire.
Dinds dil Wilche. — T'as raijon, Ugène, j'm'in va qu'minchi tout d'sute.
1. À mou Herbeaux, à Neuville, aussitôt
que l'patron y a su qu avot des traites din s'fabrique, y à diminué l'ouvrache jusqu'à 18 francs par semaine et y a foutu inne masse d'ouvtis sus l'pavé.
2. À mou Rigolo II, y a faulu qu'Eugène dit Liette, Jules Defaible, Graslard et inne paire d'autes pou l'aire l'jeu du patron pou l'y foule des ouvris à l'porle. Infin, v'la inne preuve que les d'jaunes font l'bonheur des patrons et l'malheur de l'ouvri.
Plusieurs voix. — Assez, assez.
Dinds dit Wilche. —Eh bin, j'm'in va continuer à donner lecture de l'reunion qu'in a décidé d'venir in pèlerinache.
Ouais, mes brafcs copingnons, ch'est malheureux d'toudis ête moutré au dogt pas les rues, in surplus in est toudis attatchi d'in l'sale journal qu'in appelle L'Combat tous les s'maines Jacques Rouge parle de nous autes y nous fait passer pour des véritables malfaiteurs, des émules de Bazaine, qu'in sait foque faire inne séquo dins les fabriques, ch'est trahir les ouvris. In n'arot pinsé tchan qu'in a fait l'jeu des patrons qu'cha saro oblié au d'but d'in p'tit momint, mais non, cha continu toudis. In a d'jà couru à la police, in d'à d'jà tait condamnés, espérant qu'cha va finir, mais ch'est toudis l'méme tchanchon.
Nous mêmes, in est trop vorins pou s'déf inte, cha s'comprint, tchan qu'in a po tchœur pou définte sin salaire, in n'a pu d'forche de rin. In n'avot attindu dire que l'Virge ch'étot inné gayarde et qu'elle s'rot capable d'faire tcher mort les rédacteurs du Combat.
Defaible Jules. — Bravo, bravo, Witche,
Vas raijon, ch'est par c'sale journal que les gins y parlent toudis d'nous autes.
Eugène dit Liette. — Si c'journal n'étrot pas là, y a d'jà lommint qu'in parlerot pus d'nous autes.
Dins dil Wilche. — In espère qu'in faijon s'pèlerinache que l'bonne Vierge i'ra in miraque pour nous autes car vraimint, in est à plainte.
Graslard. — Tout d'mème, in n'd'a d'jà fait, et si in est poursuivi par l'ouvri, j'n'in sus po surpris, in est des fameux capenouls.
L'ingliche. — Espérons que l'bonne Virge f'ra sin possible et qu'in pourra vivre trantchille avec les patrons in faijant mettre les ouvris à l'porte.
Rigolo II. — J'vin d'avoir parlé à l'virge, j'l'ai été trouvé à sin lit et elle ma dit qu'elle arot fait l'nécessaire pou tous les d'jaunes, vous pourrez partir contint d'vou pèlerinache et boire inné pinte à l'majon Édouard d'Herseaux [Belgique].

Jacques Rouge.

Pélerinache des d'jaunes

par Jacques Rouge (Jean-Baptiste Knockaert) — 2023-02-01T16:20:27Z

Article paru dans Le Combat de Roubaix-Tourcoing 1re année, n° 12 (13 mai 1906).

Tous les Tourquégnos savent que tous les ans au m d'mai, les calotins vont in pélerinache à Malire pour implorer l'virge de les guérir d'leu maladie.

S'l'année chi, y a eu inne nouvelle sorte d'pélerins, y parait qu'ch'élot pou guérir l'd'jaunisse, triple maladie, qu'des capenouls y ont attrapé pendant les grèves.

Dimanche passé, tous les d'jaunes de Tourco étottent réunis din in cabaret qui a pour insinre, Au Cap'let d'jaune pour partir à Marlire pou d'mander à l'virge de faire des miraques pour eusses.

Tros heures sonnent à l'Égliche Notre-Dame-de-la-Trahison [1], tchan que l'cortègc s'a mis in route. In tête du cortège in veyo l'drapeau d'jaume porté par eu l'mouchard, Kinfleur de l'rue d'Moscou, in sute du drapeau in véyo les tros pu grands capenonls de Tourco, y avot Lingliche, Eugène dit Liette [Eugène de Kauss-Lyette ?] et Jules Defaible de l'rue des Cenlons [Coulons ?], vin l'cortège in veyo tous les votias qui trahisent toudis les ouvris pindant les grèves.

Arrives à l'capelle oie Marine, y s'mettent tertous à g'noux pou tchanler c'joli refrain sur l'air de L'Internationale :
Ché nous, les détestables
Traîtres et Rénégats,
Odieux, misérables,
Suppôts du patronat.

Après qui ont fini tchanter, l'Ingliche monte d'in l'chairr de mintirie (pardon d'vérité, et qu'minchc à dire : « Mes brafes copingnons, in est terlous v'nu ichi pour implorer l'virge pour elle nous guérir de la trahisomanie (manie de trahir) in sai plus in est tertious atteints de l'd'jaunisse, couleur du pape, si y n'd'a qui ont açorc inn'aute maladie, ou bin qui ont in défaut d'constitution y n'ont qu'à l'dire.

Une voix dans le fond, — Mi, Paul, j'ai inne boche sus min dos, j'voudro bin que l'Virge f'ro in miraque pou l'faire disparaître, avec ti, j'ai trahi les ouvris, tchan que j'pourmène pa les rues j'su tondis erconnu par m'boche.
L'ingliche. — Qu'miny vou nom ?
— J'm'appelle Vulk, dit l'bochu.
L'Ingliche. — Y n'd'a pu d'autres.
Jules Defaible. — Mi j'su atteint de la délatiomanie (manie de moucharder) d'pus qui j'ai trahi l'syndicat, chaqù'fos que j'vos il ouvri qui parle du syndical, tout d'sute, j'm'in va l'moucharder au directeur ou bin au patron pou l'faire foute su l'pavé.
Rigolo II. — Mi j'ai min cou plein de bobos.
Plusieurs voix. — T'a qu'à aller à la salle des princes à l'Hôpital de Tourco t'faire sonni malpropre.
L'teigneux de l'rue du Bus. — Mi, j'ai perdu mes ch'feux mais, j'ai inne fausse perruque frisée, j'sus prope tout d'même.
Mathou. — Cha n'm'étonne po qu't'es propre ch'est mi qui soinne t'perruque. et pou récompinse, j'attrape toudis les p'tits moutons, comme Jules Marin, a toudis vin ses habits.
L'Ingliche. — J'vos qu'vous ayez tertous des défauts qu'vous êtes tertous comme mi, des sales individus. J'invite Eugène dit Liette à distribuer des cap'lets d'jaunes à tous les pèlerins pour dire les prières à la sainte Vierge.

(à suivre)

Jacques Rouge

[1] Notre-Dame-de-la-Marlière, à Tourcoing.

Mort d'Indi l'cront' tête

par inne mère chrétienne — 2023-01-31T19:08:30Z

Article paru dans Le Combat de Roubaix-Tourcoing 1re année, n° 10 (29 avril 1906).

Lalie. — Eh bé bé mon di, t'clieu malheur, t'cheu malheur, t'chi qui arot pinsé cha, éiot si bin portant, y étot si gaillard. ,
Zélie. — Quo qu'elle qui a Lalie, vous avez ben du chagrin, dites-mi pourquo qu'vous êtes si désolée.
Lalie. — Vous n'avez rin attindu dire ? Vous nètes pos din les mères chrétiennes ?
Zélie. — Eh bé si qu'j'y sus ! mais dites-mi quo qui a d'arrivé.
Lalie. — Eh bé seigneur ! Inri y est mort, chétot un si bon garchon, y n'avot jomais fait d'chagrin à personne, y avot 33 ans, et y restot acor aveuc s'mon mère, jomais y n'avot bleusé jus de s'semaine, chétot l'modèle des garchons.
Zélie. — Quo ! y est mort, ch'n'est pos vrai ben seur, j'n'avos jamais attendu parler qui étot malade !
Lalie. — Y n'étot pos malade du tout seul'rnint, y s'a laichi intréner par des apenoules [capanoules], et après y l'ont trahi et vindu comme un vrai'ré d'bo.
Zélie. — Eh bé y va bin ! je n'sais pos m'in ravoir, quo y est mort !
Lalie. — Ouai, ché ses copagnoas qui l'ont trahi, y l'ont loï avec des t'chaines, et y l'ont condu prijonni dins l'palais Vaagrosballe II ro du brun pain.
Zélie. — Et quo qui a dit c'grand capenoul.
Lalie — Y l'a fait passer pour un révolutionnaire, y a commandé inné cro, et y l'a condamné à l'porter sur sin dos jusqu'à tros heures l'après d'diner ; j'l'ai vu passer d'rire l'abattoir, y n'in povo pus c'malheureux, et sur l'queu d'3 heures, y l'ont cloë d'sus ces bougres.
Zélie. — Ah chét ses copagnons qui l'on trahi, a combin qu'y étotent ?
Lalie. — Y étotent a : quatre, y avot lingliche, dinds dit witche, matou et l'grand fidéle, et a ces judas, Vangrosballe II, il leus a donné inné paire de louis d'or.
Zélie. — Y a d'vu souffert c'malheureux d'être cloë comme cha.
Lalie. — j'te cros qui a souffert, t'chant qui tapotent d'sus, il l'y t'chéo des larmes comme des croupettes.
Lalie. — J'vins toute froide.
Lalie.— Après l'avoir matchi, et li avoir jeté des chiques su s'fidjure, s'téte elle a t'ché su l'côté, y éto mort, 3 heures sonnotent à l'égliche St-Anne.
Zélie. —Pauf garchon va, j'su seûr que sin mon père l'carpinti, et s'mon mère, l'virge Marie, y dotent braire din l'écoure de l'inne l'aute.
Lalie.•— Bah, ché acor inne demi ma, parce qui leu s'a dit qui allot erveuir au monte 3 jours après, et qui n'aro pu ré sintu des queus qui avot attrappé.
Zélie. — In n'sait pos s'faire nn idée que s'l'homme peut souffert comme cha ; in tous cas, pour que sin mon père n°1 l'bon dis n'soiche pas trop in colère, sur tout chin qui a fait su terre, j'min va aller, a m'majon printe un capclet d'jaune, et dire inne paire de prières pour li.

Arvoir Lalie !

Arvoir Zélie.

Inne mère chrétienne

Massacre des d'jaunes

par Jacques Rouge (Jean-Baptiste Knockaert) — 2023-01-31T18:45:48Z

Article paru dans Le Combat de Roubaix-Tourcoing 1re année, n° 10 (29 avril 1906).

Dimanche passé, je m'balado à l'foire de Roubaix, tout din ko jatin qu'in cri : jette ! jette ! i l'mériteot, ché dès capenoules, y
ont trahi les ouvris.

L'patron de l'baraque crio toudi, allons monsu, j'té ardimint, ché tout des coupables ! chinque balles pour in sou ! j'm'aproche pour wetti, chéto in massacre comm' in vo toudi à les ducasses, les garchons y avoteu des balles et y j'tautent avec acharnemint, j'm'avanche tout près de l'baraque, pour wetti les bon-hommes qui app'lant' traitres ; tout din ko j'arconno din ses bon-hommes, inn' clique de capenoules bin connus des Tourquégnos ch'éto, l'ingliche l'président des d'jaunes, avec sin troupeau d'avachis, Dinds dit Wit'che, Graslard, Defaible de l'rue des coulons, Charrette Charles, Eugène dit Liette, Mathou, Kinfleur de l'rue d'Moscou, Lamotte dit l'brulé, Volke dit L'bochu, Don VII de l'rue d'Paris, Rigolo II, les frères Revolver-Teigneux de l'rue du Bus etc. etc. y étautent tertous exposés à l'Baraque, avec eu s'l'inscription su leu front : traîtres, Lâches, Renégats ; in véant cha, bin vite eu j'demande inn' chinquantaine de balles, l'premi qu'j'ataque ché s'capenoul de L'inglich, du premier ko j'iabas ; après chét autour de Rigolo II, j'li jette inn' balle su s'népaule, y fait inn' demi tour, et tout l'monde vo qui et rimpli d'bobo, infin i ont tertout eu leu tour, l'derni chéto l'Teigneux de l'rue du Bus i archo inn' balle su sin front, s'péruque a volé ju de s'tête, in arro vraimint dit in pouïeux i n'avos pu in seul cheveux.

J'pinse bin qui arriv'ra in n'Io qu'cha n's'ra pu avec des balles de papis qu'in les attaqu'ras et s'jour là, y sin souven'ront d'avoir trahi les ouvris,

N.B. Din l'baraque tout ces lâches i élaute loï avec des chap'let d'jaunes

Jacques Rouge

Histoire d'inne rincontre

par Inri — 2023-01-31T07:58:02Z

Article paru dans Le Combat de Roubaix-Tourcoing 1re année, n° 2 (4 mars 1906).

J'parlos l'aute dimanche dm'majon assez pressé, comme du reste je l'sus presque toudis, pour aller vir in camarade vindeu d'journaux, un dévoué s'ti là, mais fot vous dire qui a l'tort de s'mette trop vite in colère avec ses amis, cha j'li est déjà dis pu d'inne fos, ch'n'est pos qu'au fond y est mauvais garchon bin du contraire, infin tout l'monde a des défauts, surtout avec ché sale société bourgeoise, in est par momint in bisbille pour des rins du tout, mais, bref à cha, ervénant â chin que j'veux vous raconter ; j'avos déjà fait in p'tit bout d'chemin, quand, in passant d'vant in cabaret j'attint dire : tin v'là Inri qui passe ! crions aprè, cha s'ra in d'puquc à nous compagnie.

Étant passé l'porte j'm'értourne et, juste à c'momint j'vos l'gros Jules qui sorte, in
v'nant d'sus mi et m'invite à boire inn' chope in intrant din l'cabarct, j'vos tros amis attablés, y avot Alphonse, l'grand Louis et un socialiste que j'connaicho depus in p'tit momint, in révolutionnaire s'ti là, quia été forchi d'faire l'marchand d'poreaux à cause qui n'a jomais volu s'laischi commander par personne ; y a bougremin raijon, personne in'intrc nous n'li donne tort.

Après qu'javos donné inn' bonn' peugnie d'main à chacun d'eus, j'm'assis à leu table.

Eh ben, qui m'dit l'marchand d'poreaux ; in étot in trin d'parlcr de l'question sociale, d'l'antimilitariste et de l'fameuse guerre qu'in pourrot avoir, tchan que l'couversalion a rouler sur l'Combat.

D'pus qui parait y faut t'dire que je l'lis ; malgré que je n'sus pos anarchiste, ché vrai, j'sus forchi d'avouer qu'elle un bon ptit journal, j'l'aime bin parcequi tape d'sus tout les vorins et les minteux, cha m'a même assister gramint d'avoir inn' bonne idée des camarades anarchistes. Din lès groupes socialistes in m'avos toudis dit qui n'fallot jamais discuter avec vous autes parceque vous arez été capable d'nous avaler tout d'inne, tout à fait l'même que ch'seul Baleine qui un jour y a déjà bin longmint, avot avaler Jonas d'in seul cop.

L'grand Louis, que s'langue déminche à chaque fos qu'in s'trouve insonne, li dit tout d'sute ; t'es in rare à l'colection camarate, te dos savoir qu'tout chin qu'in dit d'sus nous los qu'ché des mintiries alors ?

Justemint, justemint qui répond l'marchand d'poreaux et ché cha qui m'révolte davantache, je n'me cache pos pou l'dire à l'réunion d'min groupe et d'protester contre cha.

Et quo qu'in dit la d'sus ? qui li d'mande aussi l'gros Jules.

Ah ! ché pos malin allé, in m'invos aussitôt pu long qu'au diable. Mais accoutez camarates, j'demandro pou laichi cha trantchille ; min père, y avos l'habitude de dire, in parlant d'inné chose qui li dégoutot ; d'pus qu'in ermu du brin, pu cha put.

(À sufe)

Inri

Babillarde d'un ouvri

par Justin Pinot — 2023-01-30T15:09:14Z

Article paru dans Le Combat (Tourcoing), 2e année, n° 2 (14 janvier 1906).

Si j'ai bonne mémoire j'dos vous avoir dit qu'nous sommes din inn' fort dégoûtante société. Malgré qu'cha sot clair comme et aussi l'jour facile à vir que l'panche du gros Kahut, je l'répète bin volonti : Nous n'sommes po din d'beaux draps. À l'heure actuelle l'ouvri est din l'situation du garchon d'Éolus, Sisyphe, qui avot été condamné din les infers à rouler éternellemint jusqu'au faîte d'inn' montane, in rocher qui déroulot et ertchéot toudi. Ouvrer sans s'arrêter et rester à continuer au même point, ête aussi paufe au 31 décembre qu'au jour de l'nouvelle année, produre de pus in pus et n'avoir jomais rin, v'là notr' sort. C'hest Sisyphe et ch'est aussi Tantale, mis din l'eau jusqu'au minton, c'ti là n'pouvot jamais boire parce que l'eau s'ertirot de ses lèvres, et y n'pouvot po non pus rassasier s'faim avec les fruts des arpes dont les branques pindote dessus s'tête et qui s'in allotte din les nuaches tchan qui voulot les attraper. Les prolétaires sont ainsi au miton d'in tas d'belles affaires qui n'peuvent et n'pouront jomais avoir tant qu'y s'ront din l'société capitaliste. Les politiciens promettront volinti d'nous faire avoir tout chin qu'nous avons b'son, mais y n'faut po les croire, y sont tous aussi minteux qu'Reboux et aussi carottiers
que l'pape.

L'ouvri est condamné par l'exploitation bourgeoise à rester malheureux. In s'esquintant y n'peut tout au pus arriver qu'à n'po morir de faim. Les économistes bourgeos eux-mêmes sont obligés d'in convenir « le travailleur ne gagne que le tantum nécessaire à sa subsistance ». Chin qui veut dire qu'in nous considère ni pus ni moins qu'des bêtes de somme, des machines à ouvrer.

Et nous faijons l'fortune d'in tas d'salauds qui n'ont jomais rin foutu d'leur dix dogts. Tchan qu'in ouvri produt 20, ch'est à peine si in li laiche 5 pour s'norrir, y reste donc 15 pou l'patron. In admettant qu'y faut 10 pou les frais généraux d'toutes sortes, in peut dire que din l'pus grande partie des cas y reste au moins 5 de bénéfice net pou l'exploiteur. Din inn' fabrique coin m' celle des Motte, Tihcrghien, Vanoutryve et Cie, Lorthiois, Masurel et autres, si in compte des chintaincs, des milliers d'ouvris, ch'est des chintaincs et des milliers d'fos chinq francs que ces monsis-là mettent din leu coffres-forts tous les jours. Ainsi in admettant qu'il y a 1,000 ouvris chez Vanoutryve, l'patron gane au moins 5 x 1000 = 5000 fr. par jour. Avec des journées parelles ! in peut s'faire bâtir des grands cateaux sus l'boulcvard de la République et faire monter des fabriques à Mouscron pou l'détrimint des salariés des deux côtés de l'frontire.

Et j'vous dis, j'vous l'répeterai toudi, nous sommes din d'sales draps et cha n'est po in votant qu'y sera possible d'les faire t'changi. Voter ch'est gouverner, gouverner ch'est maintenir, maintenir ch'est conserver. Les votards sont des conservateurs.

Nous sommes malheureux ch'est donc bin atindu, l'bulletin d'vote fait durer nos misères, cha n'se discute pus, mais alors quo donc qui faut faire.

Ch'est tout simple. Tchan qu'inn' majon n'sert pus, y faut qu'ell' sot démolie. L'société capitaliste est inn' société pourrie jusqu'au fin fonds des fonds, sans l'égliche, l'armée, les prijons, d'pus longtemps ell' s'ro dégringolée. Mais ceux qui sont tout d'même à l'base de tout c'tédifice d'injustices et d'salopries ch'est les prolétaires. Ch'est sus leus épaules que tout erpose. Tchan qui l'voudront cheull' société marâte si bonne pou les patrons si mauvaise pou les sans-le-sou, pou les crève-de-faim, s'en ira d'inn' seule poussée, comme in château d'carte tché din p'tit cop d'pouce, pour faire plache nette afin qu'y sot possible d'établir chin qu'les anarchos veulent, chin que j'vous dirai l'prochaine fos.

Car in v'là assez pou aujord'hu.

D'Justin Pinot.

Babillarde d'un ouvri

par Justin Pinot — 2023-01-30T09:23:45Z

In Le Combat, 1re année, n° 6 (26 novembre 1905)

Mon di mon di, père des mouques, mon di mon di, tcheu malheur ! V'là l'hiver, mon di momèrc, tcheule misère ! Déjà ch'est l'mauvaise saison, monsi Motte, monsi Tiberdjien [1], monsi Pollet, monsi Lorthios, tous les monsis sont ervénus d'leus belles majons d'campagne, i va faire mauvais temps. Les hirondelles apportent l'printemps, les bourgeos ch'est tout l'contraire, v'là l'hiver, i pleut, i vinte, ch'est immerdant. Déjà les gosses s'in vont braire dans les jupons d'leur manman, leus p'tites frimousses sont ingelées, leus p'titcs mains sont bleuies d'fro. Et quo faire, quo faire, hélas j'vous demande, faire du fu, ouais, vous êtes beaux, in n'a même po d'carbon, ch'est à peine si in a des escarbilles pour faire à boulotter.

Ah, bon dieu, nom de dieu, de nom de dieu ! tcheu misère ! Pourtant in euffe tant qu'in peut, autant qu' possible, mais rin n'rapporte moins qu' l'ouvrache actuel --- à ceux qui l'font, bin attindu, car les patrons, eus, n'font que d's'inrichir d'pus in pus. Chin qu'i a d'pire ch'est qu'cha dure ed'pus inné éternité, d'pus fort longtemps, d'pus toudi, dijons l'mot, et qu'cha n'a po l'air., de vouloir finir ed'main.

C'pindant, mille pétards de nonnettes, l'peuple ed' France peut voter, les ouvris
français ont l'suffrage universel ed'pus 1848, ed'pus presque soixante ans. L'suffrage universel, l'bulletin d'vote, cha d'vo, cha d'vro tout tchangi. Tout, l'monde souverain, tout l'monde ro ou impereur, ch'éto mieux qu'inne mervelle, ch'éto l'pain pour tous, el' logemint pour tous, l'habillemint pour tous, ch'éto l'bien-être assuré à tout à chacun, ch'éto des tartines au burre avec du chuc gris pour tous les afants, des poupées parlantes pour toutes les p'tites filles, des mappes d'agathe [2], des grosses toupires et des polichinelles pour tous les p'tits garchons. Ch'éto tout un beau rêve — cha n'est resté qu'cha, ni pus ni moins qu'in beau rêve, in' va voter tous les quatre ans, in vote même tout l'temps d'mieux in mieux et, ch'est assez drôle, in est d'pus in pus malheureux. L'bulletin d'vote n'a jamais rin tchangi. Dijons franchemint qui n'pouvo rin tchangi et qui n échangera jamais rin.

Note misère eun' vint nullemint du gouvernemint qu' nous pouvons subir, avoir in ro, in impereur, ête in république cha n'impêche po, cha n'impéchera jamais d'morir de faim.

Ch'est là m' n'avis, ch'est aussi l'opinion du bon vieux Guesde, el'vrai loup garou d'monsi Couquebaque. Ch'est Guesde qui a dit : « le bulletin de vote ne peut servir qu'à faire de la bourre à fusil ». Boum, attrape Ugène, t'es trop p'tit mon vieux pour réponde à d'pareils argumints, l'vieux révolutionnaire n'avo pas tort in dijant c'fameux machin là, seul'mint, comme les fusils à bourre n'existent pus qu'dins les panoplies d'certains vieux maniaques, in peut dire au jour d'aujord'hu que l'bulletin d'vote eun' peut servir qu'à chin qu'vous savez bin, au numéro 100 [3], dins les commodités.

Ch'est là m'n'avis, je l'répète, vous êtes libres ed'pinser autremint. L'suffrage universel ch'est inne mauvaise farce, in s'in sert pour indormir les ouvris.

Mais m'direz-vous, ch'n'est po non pus in nous servant des cartes d'électeurs à l'plache des fagots pour alleumer nos escarbilles qu'i sera possible d'en finir avec les patrons, les crapules, les voleurs.

Bon. bon, nous verrons in peut pus tard chin qui faut faire, in v'là assez pour aujord'hu.

Bonsoir à tous.

Justin l'Roubaigno.

[1] Tiberghien.

[2] Billes de jeu, en terre cuite et en verre.

[3] Argot pour latrines.

Babillarde d'un ouvri

par Justin Pinot — 2023-01-30T06:58:11Z

Article paru dans Le Combat (Tourcoing), 1re année, n° 8 (10 décembre 1905).

Boum ! cha y est, fo d'Justin j'n'ai jamaisvu parelle affaire. J'ai tout l'mond' su l'dos,in m'in veut à mort. Pindant pus d'inn' semaine, je m'sus attindu nommé des pus vilains mots qu'in puche supposer et d'tous les noms bêtes connus din nos indrots. Les calotins blancs, les calotins d'jaun's, les calotins rouches, tous les calotins m'ervètent de travers, l'in d'eux, in jeun'homme tout fraichtmint rintré du service m'a foutu au nez nez qu'j'étos « inn' volaille », j'in su resté comm' deux ronds d'flan. Mais chin qu'y a d'pire ch'est que n'sachant pus dû donner de l'tête d'vant c'déluche de sottises, j'ai en l'malheur de négligi pindant tro ou quate
[fots ?] d'sute mes d'voirs d'homme marié invers Mme d'Justin Pinot, l'momèrc de m'fillc et d'mes deux garchons. D'sorte que, même din m'majon, l'cat est din l'horloche, in m'tourne l'tchu tout est in déroute.

Tout cha, ch'est canulant. Ête imbêté parc'que les bourgeos vous ont din l'nez
et vous impêche d'avoir de l'ouvrache, cha passe ; ête filé et impesté par l'haleine puante d'in mouchard inragi parc' que s'femme l'fait cotchu avec des bleuzeux, cha peu s'tolérer ; mais s'vir mépriji par ses amis et din s'famille parc' qu'in a des opinions avanchies, ch'est insupportable, cha lasse. Or ch'est uniquemint à cause de m'premire « Babillarde d'in ouvri » qu'in m'souhaite tous les malheurs imaginables. J'ai mantchi d'respcct invers l'suffrage universel, cha n'se pardonne jamais.

Ouais, ch'est parc'que j'ai dit mes doutes su l'utilité d'l'action électorale, ch'est pour avoir tu l'toupet d'parler d'nos misères et du découragemint d'gramint d'ouvris désabusés du bulletin de vote, ch'est pour avoir dit que l'fameux bout d'papi des élections n'peut pu servir que d'torchon din des commodités, au N° 100 [1], ch'est seulemint pour cheull' bagatelle que j'sus honni par tertou — sauf par les anarchos, bin atindu.

Ch'est canulant, je l'répète, mais cha n'peut po m'impéehi d'continuer d'écrire, y faut que j'sos compris, cha sera dur, Proudhon a dit : « Il faut frapper sur les cerveaux connue sur une enclume pour y faire entrer les idées ». Mais ch'est possible, in répétant toudi l'vérité vraie in finit par avoir raijon avec ceux qui n'ont ni les quintchets ni les boyaux d'leu caboche bourrés d'berdoulle catholique.

⁂

J'n'ai po à répéter souvint chin qu'personne n'ose contester, chin qu'j'ai déjà dit, savoir : « Malgré qu'in vote d'mieux in mieux not' misère augmente d'pus in pus ». Rin n'est pus “visible à l'œil nu” qu'cheull' simple vérité là, tout à chacun peut s'in rind' compte par li-mème. Les électeurs prolétaires — les ros d'vingt quatr' heures tous les quatr' ans — tout in ouvrant toudi comme des esclav's et comme des forçats, sont bel et bin obligis pour vivr' de s'norrir — aujord'hu comm' hier — avec in peu d'pain, des peun' terre et du lait battu, chin qui prouve que rin n'a tchangé din l'sens du mieux malgré l'fameux bull'tin d'vote.

Mais v'la qu'in m'dit qu'voter si cha n'fait po d'bin, cha n'fait po d'ma non pus, autant faire cha qu'aute cosse, in n'insi'ra po pus malheureux.

Ah, bé, saperlipopette, y n'faut tout d'mème po abuser de l'sacrée bêtise humaine, y n'faut po parler d'chcull' façon, in ouvri surtout n'a po l'drot d'raijonner ainsi. Avec des bonimiats parels in finirot par faire croire à ces monsis les patrons qu'nous espérons bel et bin rester à tout jamais leurs exploités, leurs bêtes de somme. Or je n'suppose po que c't'article là sot din not'programme — si toutefos nous avons in programme — ni din les intintions du grand nombre des travailleurs. J'ai des raijons d'croire que nous pinsons tout l'contraire et qu'in l'plache de vouloir rester des parias nous voulons arriver tôt ou tard, l'pus tôt possible, à êtes des hommes économiquemint égaux et libres. Y faut donc putôt s'demandcr si l'ouvri peut faire mieux que d'voter pour arriver à c'but là, I si, par l'pratique d'inn' action différinte d'cheull' qui est proposée par les amateurs des vaux légales, par les politiciens, y peut espérer améliorer sin sort, tchangi s'n'existinche, in in mot s'émanciper.

⁂

L'premire partie d'cheull' question devro d'pu longtemps ête résolue pour tertou, cha n'devro pu s'discuter, quo qu'in fasse in petit ète seur de faire mieux que d'voter, chin qui n'est po difficile — y est putôt impossible d'faire pire. Y vaut mieux feumer inn' bonn' bouffardc au coin du fu de s'majon que d'aller faire vir à tout à chacun qu'in est "abruti par la tète" et capable au XXe siècle, d'aller acore, kif-kif des primitits démocratis, déposer in bull'tin din l'urne pour tches in in maîte.

L'deuxième parti de l'question est graimint pus sérieuse, parler des “voies et moyens” révolutionnaires. ch'est inn' affaire q'in peut hésiter d'interprinte d'but in blanc. Y semble bin, in effet, qu'pour oser l'fairc y faut d'abord donner connaissance du système philosophique et social dont ces moyens fout nécessairement partie. Certaines explications sont a fournir pour fair' comprinte logiquemint les raijons qui ordonnent d'imployi tel moyeu d'action putôt qu'tel aute, telle tactique révolutionnaire putôt qu'telle aute tactique parlemintaire et légale. Y faut d'abord exposer
1º inn' partie négative, dire pourquo qu'nous sommes din l'misère noire et d'pus in pus malheureux din l'société capitaliste.
2º inn' partie positive, cheull'société étant archi-mauvaise, dire qu'elle organisation sociale nous proposons pour assurer l'bonheur ou putôt l'bin-être d'tout l'monde,
3º faire connaître les moyens in rapport, les moyens conformes aux fins qu'in poursut, des fins ayant pour objet essentiel : l'émancipation complète des ouvris et d'tout à chacun din l'humanité.

Y faudra donc que j'attrape inn'fos pour toute min corache à deux mains pour vous écrir' toute m'pinsée d'sus chin que j'vins d'vous dire, et, sacré mille pets d'nonnette, jcha n's'ra po tout à fait facile. Mais « vouloir ch'est pouvoir » sitôt m'quaîne fini j'erpos'rai mes navettes pour erprinte l'porte-plume et faire bertonner pu d'inn' bourrique. Pour aujord'hu y faut qu'j'in finiche, y a Mme d'Justin qui réclame pour sin pétrole et je n'veux po disputer avec l'momère de mes afants.

Ainsi donc, à l'semaine prochaine. Bonsoir à tertou… et s'femme, bonne nut à
tous.

D'Justin Pinot.

[1] Argot pour latrines.