Dimanche passé, ervénant du Mont-à-Leux avec min pus jeune garchon faro comm’ in milord din ses nouvelles bottines, j’ai rincontré inn’ paire de bons camarates socialistes du Fonteno avec lesquels j’ai eu l’plaiji d’aller boir’ inn’ chope et d’pouvoir discuter inn’ mioche. L’grand Cho, in sacré gaillard qui voudro t’nir Monsi Couquebaque au bout d’inn’ fourque, m’a erprochi l’implo que j’fais d’certains « grands mois » din mes babillardes. J’in sus devenu rouche comme in pichon du beau gardin, pinsant non sans raijon qu’in d’vo m’printe pour in faijeux
d’imbarras « in gornueux sans doupe » chin qui m’emmerde bougremint. C’pindant
j’ai cru pouvoir leur fair’ comprinte qu’y n’est po toudi possible de s’explitchi convenablemint — sans mimires savez-vous — din not’ pauf pato ouvri. Et pus, dites donc je n’sus po l’garchon du doyen d’Saint-Martin, jamais les bancs du collèche n’ont porté min malheureux tchu d’prolétaire, j’sus pu habile à rintrer mes fis au maillon cl din les broches du mot que je n’sus capable d’trouver tous les mots qu’y faut pour écrire comme les domestiqu’s a tout faire du bourgeos Reboux. Ainsi donc malgré l’erproche qui m’a été fait y faudra bin qu’je m’serve acore d’certains mots qui n’sont po toudi din not’ langage habituel, j’n’in ferai po d’abus pourtant je n’peux absolumint pos m’in passer. Mais, passons à aut’ cosse.
⁂
Nos idées comprennent, j’vous l’ai déjà dit, tros parties principales :
1º—Inn’ partie d’critique qui condamne les institutions, les bases, dijons les fondemints, les murs et l’carpinte de cheull’ sacré bordel de société actuelle, l’société capitaliste.
2º— Inn’ partie qui fait comprinte in système d’organisation sociale qui d’vro rimplachi l’organisation capitaliste et qui, d’accord avec chin qui est voulu par les ouvris, pourro donner à tout l’monde l’pus
d’bin-être et l’pus d’liberté possible.
3º— Inn’ partie d’action, servant à fair’ vir par tcheux moyens in peut espérer parvenir au but qu’in appell’ communémint l’société future.
Faire l’critique de l’société bourgeoise cha n’est po difficile, surtout tchan qu’in parle à des hommes, des femmes et des jeun’ gins obligis d’ouvrer comm’ des malheureux pour viv’ din l’pus atroce des misères. In a fait des articles, des poésies, des tchansons, des piches de théâie pour plaind’ les miséreux, les sans-le-sou, les crève-de-faim, cha est même dev’nu courant et, d’pus qu’y n’da qui ont fait fortune à braire pour nous, tout à chacun se n’est otchupé in tant soit peu. Les livr’s, les grands discours, les rivires de larmes donnés à l’honneur de not’ misère, n’ont rapporté d’bénéflces qu’à ceux qui les ont produt — au moins v’ià in ouvrache qui apporte — et n’ont po fait chin que l’bulletin d’vote n’aro pu faire. Y a acore toudi à peu prés 90.000 personnes qui meurent de misère in France din l’espace d’inn’ année, avec les 150.000 victimes de la Tuberculose cha fait bin au mal au moins 200.000 morts des sutes de l’mauvaise organisation sociale que nous sommes acore obligis d’subir. Y n’sert donc à rin d’verser inn’ gross’ larme su l’sort épouvintable des travailleurs.
Pour tcbangi l’situation des diiférints partis sociaux y a nutes cosse que tout cha à faire, y faut trouver les causes de l’injustice sociale, des iniquités, ch’est-à-dire d’toutes les saloperies qui nous ont toudi fait marronner et laudgir din inn’ détress’ inexprimable.
L’premire et principale de ces causes ch’est l’autorité économique. Certains individus sont les maites de tout et d’tous parc’que propriétaires du sol, des majons, des machines, de tout chin qui existe. Ces individus in les appell’ propriétaires, patrons, financiers, in in mot : les riches. Possédant jusqu’au plus p’tit bout d’terre, libres jusqu’à la gauche din in société faite par eux et pou leur seul profit, pouvant nous impechi d’ouvrer et d’minger comm’ bon leur semble conformémint aux drots qui leur sont donnés par ell’ forchc terrible tirée d’leur propriété, ceux qui ont la chance d’être riches, tinnent din leurs coffre-forts i’condition du bonheur humain.
Ainsi nous vivons à continuer sous l’règne du bon plaiji d’ceux à qui profitent
l’institution fondamintale de l’société actuelle : la propriété individuelle.
In pourot croire au moins qu’chin qui existe n’est po absolumint injuste, que cheuli’ propriété étant inter les moins d’ceux qui l’ont formée, produt gagnie, méritée, y n’est qu’légitime de leur in laichi l’profit. Ceux qui n’ont rin, les paufs, n’ont qu’à faire leur possible pour arriver à posséder eux aussi et y s’ront -libres, tout comm’ les bourgeos tl’aujord’hu, d’user et d’abuser d’leur bin.
Et bien, cha ch’est des couillonnates, nous sommes malheureux parc’ que les moyens d’produre sont dev’nus l’propriété d’ceux qui, n’ayant rin produt, n’y avott’ aucun drot, au bin core, n’ayant pas pus produt qu’les fautes n’y avott’ pas pus d’drots. J’ai à peu près l’àche de Monsi Motte, c’monstre là est au moins inn’ quarantaine de fos millionnaire, d’Justin Pinot, li, n’a po seul’mint vingt sous d’avanche, est-il possible ed’ soutenir que ch’est là d’ l’égalité, est-il possible ed’ croire que si Motte est riche de 40 millions ch’est tout simplement parc’ que li, sin monpère, sin grand’père et toute s’famille ont su ouvré quarante millions d’fos pu qui n’l’ont fait mes parints et pu mi-mème ?
J’foutrai l’pi din l’tchu à ceux qui oseront soutenir inn’parelle bêtise à min
nez et m’barbe. Chin qui est vrai ch’est qu’pour arriver à posséder des millions y faut s’arringer pour les faire tuer par ceux qui sont obligés, n’ayant po in centime et po in outil, de s’faire imployé par d’autes qui les exploitent in n’leur laichant qu’inn’ minime partie d’l’ouvrache accompli. Chili qu’y a d’pire acore ch’est qu’au fur et à mesure que s’développe l’industrie, au fur et à mesure que s’complique et que perfectionnent les machines y s’ra d’pus in pus impossible à l’ouvri d’avoir ces machines.
Or y n’est po difficile de comprinte que tchan qu’in possède les moyens d’produre c’est-à-dire les outils, les machines, in est maîte, non seulement d’ces moyens d’produre, mais par dessus l’marché d’tous ceux qui s’in servent. Tchan qu’in est maîte de l’machine, in est maîte de i’ouvri.
Ch’est là qu’nous in sommes, viand’à machine, viand’à patron, l’système de propriété qui assure l’omnipotence des capitalistes nous écrase, nous tue. L’exploitation d’not ouvrache, l’mise à prix du travailleur din l’esclavache hypocrite du salariat, l’exploitation d’l’homme par l’homme et l’assassinat des ouvris par les riches v’la chio qui résulte de cheull’ fameuse omnipotence du capitalisme, d’l’aulorité économique.
Cheull’ premire iniquité peut-elle êtes rédute par l’implo raisonnable (?) du bull’tin d’vote ? Nous verrons cha in peu plus tard. Pour aujord’hu, arrêtons-nous, chin qui reste à dire nous condurot trop loti et j’tins in tant soit peu à feumer ian’ boun’ bouffarde du toubac à Popol, l’ro d’carton, l’vieux père putain qu’vous connaicht bin.
D’Justin Pinot.